ആത്മാവിലേക്കൊരു മടക്കയാത്ര!


ആത്മാവിലേക്കൊരു കണ്ണാടി തിരിച്ചുവച്ചിരിക്കട്ടെ-
യിത്തിരി നേരമതിങ്ങനെ.
ഏറെപ്പറഞ്ഞുപോയ്‌, കുറഞ്ഞൊന്നിരിക്കണം
മൗനവാല്മീകത്തിൽ 
ഏകയായിത്തിരിനേരം. 
ഉണരുമ്പോളൊരു മുനിയായില്ലെങ്കിലും
മാനിഷാദ: പറയാനൊരു മനമുണ്ടാകണം
കത്തുന്നുണ്ടൊരു ചിതയാത്മാവിൽ
ചിന്തകൾ ചമതകളാക്കി, ചാരമാക്കി.
ഇത്തിരി വെള്ളം കൊണ്ടതിനെ-
ക്കെടുത്തുവാൻ
കണ്ണീരു തേവണം, തലച്ചോറു മാന്തണം.
പോകയാണിന്നൊരു ശാന്തിയാത്ര
ആത്മാവിലേക്കൊരു മടക്കയാത്ര!